အခု ကျွန်တော်ရေးမယ့်အကြောင်းအရာလေးကတော့ ထိုင်းနိုင်ငံ၊ မဲဆောက်မြို့က အထည်ချုပ်စက်ရုံတစ်ရုံမှာ အမှန်တကယ်ဖြစ်ပွားခဲ့ ဖြစ်ပျက်ခဲ့တာတွေပါ.. အဲဒီစက်ရုံမှာအလုပ်လုပ်ပြီး မတော်တဆမှုနဲ့ သေဆုံးသွားခဲ့ရတဲ့ လူတွေရဲ့ ၀ိညာဉ်တွေ၊ စက်ရုံပိုင်ရှင်သူဌေးက မွေးထားတဲ့ သရဲတွေ၊ စက်ရုံတွင်းမှာ ရန်ဖြစ်ပြီး ဆုံးသွားတဲ့လူတွေက မကျွတ်လွတ်သေးတာတွေ အများကြီးပါ.. အဲဒါကြောင့် တစ်ခုချင်းကိုသေချာဖတ်ရအောင် အပိုင်းခွဲပြီး ရေးပေးမယ်လို့ စဉ်းစားထားပါတယ်..
(၁) လူတွေကို မကြာခဏ ၀င်ရောက်ပူးကပ်တတ်သော သရဲ
စက်ရုံမှာ ခုတလော ဟိုလူ့ကိုသရဲဝင်ပူးပြန်ပြီ.. ဒီလူကို သရဲဝင်ပူးပြန်ပြီ.. ခဏခဏဖြစ်လွန်းလို့ ကြောက်ပြီး စက်ရုံပြောင်းသွားသူတွေလည်း မနည်းပါဘူး.. အဲဒီသတင်းကြားတော့ ကျွန်တော်လည်း စိတ်ဝင်စားတဲ့လူပီပီ စက်ရုံမှာလည်း အစ်မ၀မ်းကွဲတွေ ညီဝမ်းကွဲတွေ ရှိနေတာကလည်း တစ်ကြောင်း နောက် စက်ရုံလုံခြုံရေးနဲ့လည်း ခင်နေတာကြောင့် အဲဒီစက်ရုံမှာ တစ်ည သွားအိပ်ဖို့ ဆုံးဖြတ်လိုက်ပါတယ်.
ဒီလိုနဲ့ ကျွန်တော်ရောက်တဲ့ညမှာ ဘယ်သူ့ကိုမှ ၀င်မပူးသေးတာကြောင့် ပျင်းပြီး ညီအစ်ကိုတွေ ဂစ်တာတီးနေတုန်း ကျွန်တော်တို့ ဂစ်တာဝိုင်းထဲမှာ ထိုင်ပြီး သီချင်းဆိုနေတဲ့ အသိသူငယ်ချင်းတစ်ယောက်က အပေါ့သွားအုန်းမယ် ဆိုပြီးထွက်သွားပါတယ်.. ဒါပေမယ့် တအောင့်လောက်လည်းကြာရော.. လည်ပင်းကြီးစောင်း ခြေထောက်တစ်ဖက် ဒရွတ်ဆွဲပြီး ပြန်ရောက်လာပါတော့တယ်.. ပထမတော့ ကျွန်တော်တို့အားလုံးက ဒီကောင်စနေတယ်လို့ပဲထင်ခဲ့ကြတာပါ.. ဒါပေမယ့် အသံသြသြကြီးနဲ့
" ငါ ဘုရားဖူးချင်တယ်.. ငါ့ကိုလိုက်ပို့... " လို့ပြောပါတယ်.. ကျွန်တော်ကလည်း ဒီကောင် ဘာကြောင်တာလဲပေါ့.. အဲဒီမှာ အတွေ့အကြုံရှိတဲ့ အစ်ကိုတစ်ယောက်ကထပြီး
" မင်း ဘယ်သူလဲ.. " လို့ထမေးပါတယ်.. အဲဒီမှာ ဒီကောင်က
" ငါ ဇော်သိန်းပဲ.. " လို့ပြန်ဖြေပါတယ်.. အမှန်တကယ်တော့ အခုသရဲဝင်စီးခံထားရတဲ့ကောင်က ဒီစက်ရုံကိုရောက်တာသိပ်မကြာသေးဘူး.. နောက်ပြီး သူ့နာမည်က မျိုးမြင့်ထွန်း ပါ.. ဇော်သိန်း ဆိုတဲ့နာမည် သူသိတောင် မသိပါဘူး..
အဲဒါနဲ့ အဲဒီအစ်ကိုက
" မင်းလာပြန်ပြီလား.. မင်း ဘာလိုချင်လို့လဲ.. " လို့မေးပါတော့တယ်..
အဲဒီအခါ ၀င်ပူးခံထားရတဲ့ကောင်က " ငါ ဒီတစ်ခါလာတာ နောက်ဆုံးပဲ.. ငါကျွတ်ချိန်တန်သွားပြီ.. အခု ငါ ဘုရားဖူးချင်တယ်.. နောက်မှာ ငါလို ကျွတ်မယ့် ငါ့သူငယ်ချင်းတွေလည်း ပါသေးတယ်.. " ဆိုပြီး နောက်ကို လက်ညိုးထိုးပြပါတယ်..
ကျွန်တော်တို့လည်း မကြောက်တတ်ပေမယ့် ကြက်သီးထသွားပါတယ်... နောက်တော့ ကျွန်တော်တို့အားလုံးတိုင်ပင်ပြီး အနားက ဘုန်းကြီးကျောင်းမှရှိတဲ့ ဘုရားကိုခေါ်သွားပါတယ်.. သွားတာက ကျွန်တော်တို့အဖွဲ့မှာ အပူးခံရတဲ့လူရယ် ကျွန်တော်ရယ်.. အစ်ကိုတစ်ယောက်ရယ်.. သူငယ်ချင်းတစ်ယောက်ရယ် စုစုပေါင်း ၄ ယောက်သွားကြတာပါ.. လေးယောက်တန်းစီသွားကြပေမယ့် ကျွန်တော်တို့နောက်က ခြေသံတစ်အုပ်ကြီးပါလာတာကို ကြားရပါတယ်.. ကျွန်တော်တို့လည်း အချင်းချင်းလက်တွေတွဲထားကြပေမယ့် လက်ဖျားတွေ အေးစက်နေတာပေါ့ဗျာ.. ဘုန်းကြီးကျောင်းပေါက်ရောက်တော့ ဘုန်းကြီးကျောင်းတံခါးပိတ်သွားပါပြီ.. အဲဒါနဲ့
" ကဲ.. မင်းတို့အပြင်ကနေပဲ ဘုရားဖူးပြီးပြန်ကြတော့.. နောက်လည်း အဲလိုဝင်ဝင်မပူးနဲ့တော့.. " ဆိုပြီး ဖူးခိုင်းလိုက်ပါတယ်.. ဘုရားကို လက်အုပ်ချီဦးချပြီးတာနဲ့ ၀င်ပူးခံရတဲ့သူငယ်ချင်း လဲကျသွားပါတော့တယ်.. နောက် ကျွန်တော်တို့ သူကိုဝိုင်းပွေ့တော့မှ တစ်ယောက်ချင်းစီကိုကြည့်ပြီး ဘာဖြစ်လို့ ဒီနေရာကိုရောက်နေသလဲလို့ မေးပါတော့တယ်.. အဲဒါနဲ့ ကြောက်မှာစိုးလို့ အဖြစ်မှန်တွေမပြောဘဲ စက်ရုံကိုပြန်ခေါ်လာပါတယ်.. ဒါပေမယ့် နောက်က ခြေသံတချို့ကတော့ ပျောက်မသွားသေးပါဘူး.. ကျွန်တော့်စိတ်ထင် စောစောကသရဲတွေထဲက မကျွတ်သေးတဲ့တချို့ ကျွန်တော်တို့နောက် ပြန်လိုက်လာတဲ့ပုံပါပဲ.. ကျွန်တော်တို့လည်း ဘာလုပ်လို့ လုပ်ရမှန်းမသိတော့ပါဘူး.. အချိန်ကြည့်တော့လည်း ညနက်နေပါပြီ.. လမ်းဘေးကဆိုင်တွေ အိမ်တွေလည်း ပိတ်နေပါပြီ.. သီချင်းအော်ဆိုမယ်ဆိုရင်လည်း တခြားနိုင်ငံမှာဆိုတော့ အဆင်မပြေပါဘူး.. ပြေးမယ်ဆိုရင်လည်း လမ်းဘေးခွေးတွေမှ နည်းတာမဟုတ်ဘူး.. တော်ကြာ သရဲလိုက်လို့ မသေဘဲ ခွေးကိုက်လို့သေနေအုန်းမယ်လို့တွေးပြိး ဒီအတိုင်း လေးယောက်သားကပ်ပြီး ခြေလှမ်းကျဲကျဲလှမ်းပြီး မပြေးရုံတမယ် သွားကြရပါတယ်.. လမ်းမှာတွေ့တဲ့ခွေးတိုင်း အူလိုက်တာဗျာ.. ခွေးဆိုတဲ့သတ္တ၀ါကလည်း တစ်ကောင် အူရင် ရှိရှိသမျှခွေးတွေ အကုန် အူပါတော့တယ်.. ဟောင်တာမဟုတ်ပါဘူး.. ၀ိုင်းအူကြတာပါ... ကျွန်တော်တို့မှာ ခွေးကိုက်မှာကြောက်ရတာကတစ်မျိုး.. ဘယ်သရဲက ဘယ်အချိန်ခြောက်မလဲဆိုတာ စဉ်းစားပြီးကြောက်ရတာက တစ်မျိုး.. တော်တော်ဒုက္ခများတဲ့အချိန်ပါပဲဗျာ..နောက်ဆုံး စက်ရုံနားရောက်မှ မထူးဘူးကွာ ပြေးမယ်လို့ တစ်ယောက်က ပြောလိုက်တာနဲ့ တန်းနေအောင် ပြေးကြတော့တာပါပဲ... စက်ရုံထဲရောက်တဲ့အချိန်တောင် နဂိုထိုင်နေကြနေရာမှာ မထိုင်ဖြစ်တော့ပါဘူး.. တစ်ခါတည်း အဆောင်ထဲတန်းဝင်တော့ စောင့်နေတဲ့လူအုပ်ကြီးနဲ့တွေ့ပြီး ဘုရားသောက်တော်ရေကို စွန့်ပြီးတိုက်တဲ့လူကတိုက် .. ဘုရားစာအုပ်လှန်ပြီး ရွတ်တဲ့လူက ရွတ်.. ပုတီးကို လည်ပင်းဆွဲပေးတဲ့လူကဆွဲပေးကြပါတယ်.. ကျွန်တော်ကိုလည်း သောက်တော်ရေတွေတိုက်ပြီး လည်ပင်းမှာလည်း ပုတီးတစ်ကုံး ဘယ်သူလာဆွဲပေးမှန်းမသိပါဘူး.. ကျွန်တော်တို့ပြန်လာပြီဆိုတာ လမ်းထိပ်နားမရောက်ခင် တောက်လျှောက်ခွေးတွေအူနေကတည်းက စက်ရုံကလူတွေက စိတ်ပူနေကြတယ်လို့ပြောပါတယ်.. အဲဒီနောက် အပူးခံရတဲ့လူကိုလည်း ဘယ်လိုအပူးခံရလဲ ဆိုတာ ၀ိုင်းမေးကြပါတယ်.. သူပြောပြတာကတော့ သူအိမ်သာအသွား အိမ်သာရှေ့မှာ လည်ပင်းစောင်းစောင်းလူတစ်ယောက်တွေ့တာနဲ့ ဘယ်သူလဲလို့ အကြည့်မှာ မျက်နှာတစ်ခြမ်းလုံးသွေးတွေနဲ့တွေ့ရတဲ့အခါ သူလည်း လန့်ပြီးအော်မယ် အလုပ်မှာ ဘာဖြစ်လို့ဖြစ်သွားမှန်းမသိတော့ပါဘူး.. တဲ့.. နောက် သူ ဘုန်းကြီးကျောင်းအပေါက်ဝမှာလဲနေမှ ပြန်အသိဝင်လာတာပါ.. တဲ့.. ကျွန်တော်လည်း အဲဒီဖြစ်ရပ်ကို စိတ်ဝင်စားလို့ နောက်ကြောင်းရာဇ၀င်စုံစမ်းတဲ့အခါ.. အခုသရဲဖြစ်နေတဲ့သူဟာ အရင်လူ့ဘ၀တုန်းက ဒီစက်ရုံမှာ နှစ်တော်တော်ကြာကြာ လုပ်ခဲ့တဲ့အလုပ်သမားဟောင်းတစ်ဦး ဖြစ်ကြောင်း.. အရက်ကိုလည်း ခွက်ပုန်းကစ်တတ်ကြောင်း.. တစ်နေ့ နေတဲ့တန်းလျားမိုးယိုနေတာကို အရက်သောက်ပြီး တက်ဖာရင်းနဲ့ အမိုးပေါ်က ပြုတ်ကျသေဆုံးခဲ့တဲ့အကြောင်း.. ပြုတ်ကျတဲ့နေရာမှာပဲ ခြေကျိုးလက်ကျိုး ဇတ်ကျိုးသေဆုံးခဲ့ကြောင်း.. သူသေဆုံးသွားပြီးတဲ့နောက်ပိုင်းမှာ အဲဒီအမိုးပေါ်မှာ သေဆုံးခဲ့တဲ့ ၀တ်စုံနဲ့ မကြာခဏမြင်ရကြောင်း.. အမိုးပေါ်မှ တဒုန်းဒုန်း အသံများဖြင့် ဖြတ်ပြေးပြီးခြောက်လှန့်ခြင်း.. အမိုးပေါ်မှ တွေ့တဲ့လူများကို လက်ယက်ခေါ်ခြင်း အနံ့ပေးခြင်း အစရှိတဲ့ ခြောက်လှန့်ခြင်းများပြုလုပ်တတ်ကြောင်းနဲ့ နောက်အဲလိုတွေမခြောက်လှန့်တော့ဘဲ လိပ်ပြာငယ်သောသူများကို ပူးကပ်ခြင်းအားဖြင့် စားစရာများ နေစရာများတောင်းခံတတ်ကြောင်း.. အမျှဝေသော်လည်း မကျွတ်ဘဲ ခုမှ ကျွတ်သွားကြောင်း သိရပါတယ်.. အဲဒီဖြစ်ရပ် ဖြစ်ပြီးတဲ့နောက်ပိုင်းမှာ အဲဒီစက်ရုံမှာ ၀င်ပူးတဲ့ဇာတ် တစ်ခန်းရပ်သွားပါတော့တယ် ခင်ဗျာ....
အဲဒီစက်ရုံမှသရဲများအကြောင်း ဆက်လက်ဖော်ပြဖို့ရှိနေပါသေးတယ်.. ဒါပေမယ့် ဒီသရဲကတော့ ဒီမှာပဲ ဇာတ်လမ်းဆုံးသွားပါပြီ.. နောက်တစ်ပိုင်းကျတော့ နောက်တစ်ကောင်ပေါ့နော်.. စက်ရုံနာမည်ကို ကာယကံရှင်များရဲ့သဘောဆန္ဒအရ ထည့်သွင်းဖော်ပြမထားတာကိုတော့ ခွင့်လွတ်နားလည်ပေးစေလိုပါတယ်...
အားပေးကြသော စာဖတ်ပရိသတ်များကို အထူးကျေးဇူးတင်ပါတယ်..
စာဖတ်ပရိသတ်များကို အထူးလေးစားလျက်..
No comments:
Post a Comment